காலம்

அறையின் மேலே சுற்றி அலையும் மின்விசிறியோடு
சேர்ந்தே சுழன்றது எனக்கான காலம்.
எட்டிப் பிடித்துவிட எத்தனித்த தருணங்களில்
கைகளுக்குள் சிக்காமல் சுழன்றபடி இருக்கிறது.
துணைக்கு அழைத்த தாம்புக் கயிறும்
காலத்தின் சுழற்சியில் என் கழுத்தை சுற்றிக் கொண்டது.
மூச்சு முட்டி தத்தளித்து,
தூக்கி வீசப்பட்டு,
அறையின் ஓரத்தில் கிடந்தவன் மீது
நான் பார்த்துக் கொண்டிருந்த கணத்திலேயே
கீழிறங்கி,
என்னை மிதித்து, நடந்து, கடந்து சென்றது காலம்